Xamenei ölüb, yoxsa...? | İran 14 hərbi bazaya hücum edib - Baku TV

İndiyədək regionda 14 ABŞ hərbi bazasına hücum edilib.

“Tasnim” agentliyinin məlumatına görə, ABŞ bəzi ölkələrdə birdən çox hərbi bazaya malikdir və İranın həyata keçirdiyi raket və PUA hücumları hər bir ölkədə yalnız bir baza ilə məhdudlaşmayıb.

Bundan başqa, Qətərdəki ABŞ hərbi bazasında edilən dron hücumunda ABŞ-yə məxsus “AN/FPS-132” erkən xəbərdarlıq radarı SEPAH tərəfindən məhv edilib. Qətər Müdafiə Nazirliyi bu məlumatı təsdiqləyib.

Qeyd edək ki, sözügedən radar ABŞ-nin raketdən müdafiə şəbəkəsinin bir hissəsidir və “Əl-Üdeyd” aviabazasında yerləşir. O, uzaqmənzilli raket buraxılışlarını aşkar etmək və izləmək üçün nəzərdə tutulub. Radarın qiymətinin 1,1 milyard dollar olduğu ehtimal edilir.

İranın xarici işlər naziri Abbas Əraqçi ölkəsinin ali lideri və Prezidentinin ölüm xəbərinə münasibət bildirib.

A.Əraqçi “NBC News”a bildirib ki, Ayətullah Əli Xamenei və Prezident Məsud Pezeşkian hər ikisi də sağdır.

XİN rəhbəri İran Ordusunun bir və ya iki komandirini itirmiş ola biləcəyini deyib və əlavə edib ki, bu, böyük problem deyil:

“Onlar bizə hücum edərkən sadəcə oturub seyr edə bilmərik. Biz də özünü müdafiə məqsədilə Amerika bazalarına zərbələr endiririk”.

O, ABŞ Administrasiyasının niyə danışıqlara başlamaqda israr etdiyini və sonra İrana hücum etdiyini anlamadığını qeyd edib.