Yaxın Şərqdə vəziyyət gərginləşdi | İsraildə hədəflər məhv edildi
“Hizbullah” iyulun 30-da komandir Fuad Şükürün öldürülməsinə görə qisas əməliyyatına başlayacağını elan edib. Bu səbəbdən İsrail ərazisinə 300-dən çox raket atıb.
Təl-Əviv tərəfi də ölkədə 48 saatlıq xüsusi fövqəladə vəziyyət elan edib.
Avqustun 26-sı səhər saatlarında adıçəkilən hərbi qruplaşma əməliyyatın 1-ci mərhələsinin başa çatdığını açıqlayıb. Hərəkatdan o da bildirilib ki, İsrail ərazisində 10-dan çox hərbi hədəf məhv edilib.
İsrail Ordusu da öz növbəsində “Hizbullah”ın hücuma hazırlaşdığını qeyd edərək Livanın cənubuna kütləvi raket zərbələri endirib. Yerli medianın yaydığı informasiyaya görə, SAXAL 100-ə yaxın döyüş təyyarəsi ilə hücuma keçib.
Məsələ ilə bağlı ölkənin Baş naziri Benyamin Netanyahu da açıqlama verib.
“Bu gün baş verənlər hekayənin sonu deyil. “Hizbullah” səhər başlayandan raket və pilotsuz təyyarələrlə İsrailə hücum etməyə çalışıb. Biz İsrail Ordusuna təhlükəni aradan qaldırmaq üçün güclü qabaqlayıcı zərbələr endirməyi tapşırdıq. Ordumuz minlərlə qısamənzilli raket atdı. Bütün bunlar insanlarımızı qorumaq üçün idi. Bundan əlavə, “Hizbullah”ın ölkənin mərkəzinə atdığı bütün PUA-lar da ələ keçirildi. 3 həftə əvvəl onların Baş Qərargah rəisini aradan götürdük. Beyrutdakı Nəsrullah və Tehranda olan Xamenei – hər ikisi bilməlidir ki, bu, şimaldakı vəziyyəti dəyişmək və sakinlərimizi evlərinə qaytarmaq yolunda növbəti addımdır”, – B.Netanyahu qeyd edib.
Onu da bildirək ki, bütün bunlar regionda genişmiqyaslı bir müharibənin başlayacağına dair narahatlıqları artırıb. Xarici medianın məlumatına görə, Qəzzada vuruşan HƏMAS-la müqayisədə Livandakı eskalasiya hər iki tərəf üçün ciddi itkilərlə nəticələnə bilər.
![icon](/images/loading.png)