Yəmənə silsilə zərbələr endirildi

ABŞ və Böyük Britaniya Yəmənin husilərin nəzarətində olan ərazilərinə gecə boyu silsilə zərbələr endirib.

Bu barədə hərəkata məxsus “Əl Masirah” telekanalı məlumat yayıb.

Bildirilib ki, koalisiya qüvvələri tərəfindən Damar, Taiz, Hodeyda və Əl-Bayda əyalətlərinə ard-arda hücumlar edilib. ABŞ Silahlı Qüvvələri Mərkəzi Komandanlığı da məlumatı təsdiqləyib. Qeyd olunub ki, ölkənin Hərbi Dəniz Qüvvələri husilərin 14 raket buraxılış qurğusunu hədəf alıb.

Pentaqonun sözçüsü Patrik Rayder də məsələyə aydınlıq gətirərək bildirib ki, bu hadisədə husilər özləri günahkardırlar:

"Husilər özlərindən soruşmalıdırlar ki, bu qeyri-qanuni, ehtiyatsız və təhlükəli hücumlar fonunda öz imkanlarının nə qədər aşağı salınmasını və məhv edilməsini istəyirlər? Vurğulayım ki, bütün bunlar ABŞ-yə aid deyil.

Bu, dünya ölkələrinin ticarətin 10-15%-nin tranzit keçdiyi Qırmızı dənizdə su yolu ilə təhlükəsiz şəkildə ticarət etməsi məsələsidir. Bizim diqqətimiz də məhz buna yönəlib. Biz sözügedən hücumların qarşısını almaq üçün beynəlxalq ictimaiyyətlə sıx işləməyə davam edəcəyik”.