“Yeni hücumların qarşısını almaq üçün...” | Hakan Fidandan açıqlama

“Hər bir ölkənin milli təhlükəsizliyini qorumaq hüququ və öhdəliyi var. Buna görə hazırda müzakirə edilən sülh sazişi yalnız Ukraynadakı müharibəni sona çatdırmaq üçün deyil, həm də bütün Avropa üçün davamlı sabitlik yaratmaq baxımından çox önəmlidir”.

Bunu Türkiyə xarici işlər naziri Hakan Fidan Almaniyanın “Die Welt” qəzetinə müsahibəsində Rusiyanın 2029-cu ildə NATO ölkələrinə hücum edəcəyi ilə bağlı sualı cavablandırarkən deyib.

“Bu kontekstdə Avropanın təhlükəsizliyinin necə təmin edilə biləcəyi baxımından təklif olunan sazişin bəzi bəndlərini yaxından nəzərdən keçirməliyik. Mən bunu yeni hücumların qarşısını almaq üçün tarixi bir fürsət kimi görürəm.

Belə bir saziş bir tərəfin hər hansı səbəbdən digərinə hücum etməyəcəyinə dair açıq öhdəlikləri ehtiva etməlidir. Bu barədə razılıq əldə olunsa, bölgədə 50-60-70 il və ya daha uzun müddət sülh təmin edilə bilər.

Bir müddət əvvəl Vilnüsdə oldum, orada NATO-nun şərq qanadındakı ölkələrindən bir çox insanla danışdım. Orada Moskvanın sözünə etibar edilmir. Putin də Ukraynaya hücum etməyəcəyini bəyan etmişdi. Sülh sazişi, öz təhlükəsizlik tədbirlərindən imtina etmək demək deyil. Avropalılar da, ruslar da bunu etməyəcək, əksinə, fərqli ssenarilərə qarşı hazırlıqlarını davam etdirəcəklər. NATO da bunu edəcək. Sülhün nə qədər davam edəcəyini zaman göstərəcək. Amma Rusiya da iqtisadi-sosial baxımdan zərər çəkir və sazişdən fayda görəcək”, – o vurğulayıb.