Zatulin Paşinyanı ifşa etdi: Qərbdən ümidi məhz budur!

“Ermənistanın Baş naziri Nikol Paşinyanın işi bundan sonra Rusiya hərbi bazalarını çıxarmaq, onların yerinə Qərb bazalarını yerləşdirməkdir”.

Bu barədə Rusiya Dövlət Dumasının MDB işləri üzrə komitəsi sədrinin birinci müavini Konstantin Zatulin danışıb.

Qeyd edək ki, ötən gün N.Paşinyan Rusiya hərbi bazalarının respublikada mövcudluğunu davam etdirməsində heç bir üstünlük görmədiyini bildirib.

O, İrəvanın özünə yeni tərəfdaşlar axtardığını, çünki Rusiyanın müttəfiqlik öhdəliklərini yerinə yetirə bilmədiyini söyləyib. Lakin onun sözlərinə görə, hazırda Ermənistanda Rusiya bazasının ölkədən çıxarılması məsələsi müzakirə olunmur.

K.Zatulinə görə, N.Paşinyan beynində həm Rusiya ilə münasibətlər, həm də hərbi bazalarla bağlı hər şeyi həll edib.

“N.Paşinyan Rusiya ilə bağlı mövqeyini çoxdan qərarlaşdırıb. Sadəcə əsl niyyətlərini dərhal elan etmir. O, indi Qarabağda baş verənlərdən istifadə edib günahı Rusiyanın üzərinə yıxmaq istəyir və Qərbə üz tutmasını məhz bununla izah edir. Ermənistan Baş naziri ümid edir ki, onun bu mövqeyi Qərb tərəfindən qiymətləndiriləcək və ona hakimiyyətdə qalmağa kömək edəcək”, – deyə rusiyalı deputat bildirib.