Zaxarova Qərbi nədə ittiham edir? | Rusiya Gürcüstanın daxili işlərinə qarışmır!

“Rəsmi Moskva gürcü müxalifətinin Rusiyanın Gürcüstanın daxili işlərinə qarışmaq ittihamlarını qətiyyətlə rədd edir”.

Bunu Rusiya Xarici İşlər Nazirliyinin rəsmi nümayəndəsi Mariya Zaxarova deyib.

O bildirib ki, Gürcüstanın daxili işlərinə Rusiya deyil, Qərb qarışır:

“Bu cür bəyanatlarla çıxış edənlərə xatırladırıq ki, bizim Gürcüstanla diplomatik əlaqələrimiz yoxdur. Rusiya bu ölkə ilə əsasən ticarət, iqtisadi və humanitar əlaqələri inkişaf etdirir. Qərb sözün əsl mənasında gürcü seçicilərinin qollarını bağlayıb və onları parlament seçkilərində “lazım olduğu kimi” səs verməyə məcbur edib. Moldovada da eyni vəziyyət yaşanır. Gürcü xalqı bu təzyiqlərə baxmayaraq, sabitliyin və ənənəvi dəyərlərin lehinə səs verib”.

M.Zaxarova əlavə edib ki, Rusiyanın müdaxiləsi haqqında danışılması “oğrunun özünü ələ verməsi” vəziyyətinə oxşayır:

“Qərb bunu öz cinayətlərini ört-basdır etmək və Qafqazda vəziyyəti gərginləşdirmək üçün edir. Onlara elə bir hakimiyyət lazımdır ki, Gürcüstan dövləti və xalqı üçün deyil, ancaq Qərbə işləsin. Əminəm ki, gürcü xalqı bu təxribatlara boyun əyməyəcək və ölkələri üçün kimin real təhlükə törətdiyini özü müəyyənləşdirəcək”.