Zaxarovadan açıqlama: Rusiyanın Ermənistanın sammitə qatılmamasına münasibəti

“Ermənistan hakimiyyətinin Minskdə keçiriləcək Kollektiv Təhlükəsizlik Müqaviləsi Təşkilatının Sammitində iştirak etməmək qərarı təəssüf doğursa da, qapılar açıqdır”.

Bunu Rusiya Xarici İşlər Nazirliyinin sözçüsü Mariya Zaxarova keçirdiyi ənənəvi brifinq zamanı deyib.

“Biz inanmırıq ki, bu qərar erməni xalqının uzunmüddətli maraqlarına uyğundur və dost ölkənin təhlükəsizliyinin, sabitliyinin möhkəmlənməsinə töhfə versin.

Eyni zamanda biz anlayırıq ki, erməni həmkarlarımız təşkilatın nizamnamə orqanlarının işini əngəlləmək və ya artıq razılaşdırılmış sənədlərin təsdiqinə mane olmaq niyyətində deyillər. Bu, İrəvan üçün açıq qapılar qoyur və Ermənistana gələcəkdə KTMT-nin fəaliyyətinə qoşulmağa imkan verir”, – o qeyd edib.

Mariya Zaxarova əlavə edib ki, Ermənistan xarici siyasət vektorunu kəskin dəyişmək niyyətini büruzə verir. O, Ermənistan rəhbərliyinin ölkənin siyasi xəttinin şaxələndirilməsi ilə bağlı bəyanatlarını əsl niyyətləri gizlətmək cəhdi adlandırıb:

“Ermənistanın xarici siyasət vektorunu dəyişmədən xarici siyasi xəttini şaxələndirməsini şərh etməyə bilmərəm. Aydındır ki, söhbət respublikanın xarici siyasət oriyentasiyasında köklü dəyişiklikdən gedir.

Bu isə çox aydın şəkildə Qərbin təklifi və ya təlqini ilə həyata keçirilir. Digər tərəfdən, onlar inanırlar ki, bu yolla həm yardımın, həm də xüsusi münasibətlərin əvvəlki səviyyəsini qoruyub saxlaya biləcəklər, hər cür yolla bunun üstünü örtməyə çalışırlar”.

Rusiya Xarici İşlər Nazirliyinin sözçüsü Mariya Zaxarova əlavə edib ki, Moskva üçtərəfli bəyanatlar əsasında Bakı və İrəvan arasında münasibətlərin hərtərəfli normallaşması üzərində fəal çalışır.