Zelenski ABŞ-a səfərə gedir

Ukrayna Prezidenti Volodimir Zelenskinin dekabrın 21-də ABŞ-yə səfəri gözlənilir.

O bu barədə rəsmi tviter hesabında məlumat verib. Bildirib ki, ABŞ Prezidenti Co Baydenlə Ağ Evdə görüşü planlaşdırılır.

“Ukraynanın sabitliyini və müdafiə qabiliyyətini gücləndirmək üçün Vaşinqtona gedirəm. Co Baydenlə Ukrayna və ABŞ arasında əməkdaşlığı müzakirə edəcəyik", - deyə V.Zelenski bildirib.

Xarici mətbuatda bu görüşün təfərrüatları açıqlanarkən qeyd olunub ki, Co Bayden dekabrın 11-də Volodimir Zelenskini Vaşinqtona dəvət edib, Ukrayna Prezidenti 3 gün öncə bu dəvəti müsbət qarşılayıb.

Ağ Evin rəsmi saytında isə bildirilib ki, bu səfər ABŞ-nin Ukraynaya lazım olan müddət ərzində, o cümlədən iqtisadi, humanitar və hərbi yardımlar vasitəsilə dəstək vermək üzrə sarsılmaz öhdəliyini vurğulayacaq. Bayden Zelenskiyə təzyiq etmək və ya onu Rusiya ilə danışıqlara sövq etmək niyyətində deyil, əksinə, Ukraynanın gələcəkdə danışıqlar masası arxasında daha yaxşı mövqedə olmasını təmin etməyə çalışacaq.

Xatırladaq ki, bu, Rusiya-Ukrayna müharibəsindən sonra Zelenskinin ilk xarici səfəri olacaq.