Zelenski Rusiya aviasiyasına qarşı keçirilən uğurlu əməliyyatdan danışdı

Ukrayna Prezidenti Volodimir Zelenski özünün “Telegram” hesabında ölkənin Təhlükəsizlik Xidmətinin rəhbəri Vasili Malyukla görüşünü əks etdirən fotoşəkil paylaşaraq keçirilən uğurlu əməliyyata görə ona təşəkkür edib.

Zelenski Rusiya aviasiyasının kütləvi məhv edilməsini, müharibə zamanı ölkənin ən uzunmənzilli əməliyyatı adlandırıb. O həmçinin Malyuka əməliyyatın açıqlana biləcək təfərrüatları və nəticələri barədə ictimaiyyətə məlumat verilməsini tapşırıb.

Zelenskinin sözlərinə görə, planlaşdırmanın əvvəlindən əməliyyatın effektiv həyata keçirilməsinə qədər bir il, altı ay və doqquz gün keçib.

“Əlbəttə, indi hər şeyi deyə bilmərik, amma bunlar Ukraynanın uğurlarıdır. Onlar mütləq tarix kitablarında qalacaq. Ukrayna özünü müdafiə edir və tamamilə haqlıdır. Biz hər şeyi edirik ki, Rusiya bu müharibəni bitirmək ehtiyacını hiss etsin. Rusiya bu müharibəni başlatdı və Rusiya buna son qoymalıdır”, ‒ ukraynalı lider bildirib.

Qeyd edək ki, Ukrayna Ordusu Rusiyanın aviasiya infrastrukturuna qarşı “Hörümçək” adlı xüsusi genişmiqyaslı əməliyyat həyata keçirib. Ölkə mətbuatınının verdiyi məlumata görə, nəticədə 40-dan çox təyyarə, o cümlədən A-50, Tu-95 və Tu-22 M3 məhv edilib.