Zurabişvilinin əlinə fürsət düşdü ki... | Fransa səfərində maraqlı nüans

Gürcüstanda prezident seçkilərinə bir həftə qalmış hazırkı dövlət başçısı Salome Zurabişvili ölkəsində baş verənləri dünya ictimaiyyətinə çatdırmaq üçün Fransaya gedib.

Bazar günü gecə “Gürcü arzusu” hökuməti üçün gözlənilmədən Zurabişvili bərpa edilmiş Notr-Dam kilsəsinin açılış mərasimində iştirak etmək qərarına gəlib.

Bildirilib ki, dünyanın 50-yə yaxın ölkəsinin liderlərinin toplaşdığı mərasimdə Zurabişvili fürsətdən istifadə edərək ABŞ-nin yeni seçilmiş prezidenti Donald Tramp və Fransa Prezidenti Emmanuel Makronla görüşüb.

“Mən Prezident Tramp və Makronla dərin müzakirə apardım. Söhbət oğurlanmış seçkidən və gürcü xalqına qarşı qorxulu repressiyalardan gedirdi. Mən güclü Amerika Birləşmiş Ştatlarının dəstəyinin zəruriliyini vurğuladım. Gürcü xalqının Donald Tramp simasında bir dostu var. Allah Amerikanı qorusun”, – o deyib.

Eyni zamanda parlamentə daxil olan, lakin onun işində iştirakdan imtina edən dörd müxalifət partiyası bildirib ki, “Gürcü arzusu” Trampla dialoq qura biləcəyinə inandıraraq həmvətənlərini yenidən aldadıb. Əslində isə ünsiyyəti hakimiyyətin əleyhdarlarını dəstəkləyən Zurabişvili qurub.