"Biz başa düşənə qədər hamısı gəldi" | Goranboydakı qorxulu hadisə barədə detallar - Baku TV

Goranboy rayonunun Nizami kəndi yaxınlığında yerləşən sursat anbarında sentyabrın 2-də, gecə saatlarında yanğınla müşayiət olunan güclü partlayış baş verib. Hadisə nəticəsində xəsarətalanların olmadığı bildirilir.

Kənd sakinlərindən biri hadisə ilə bağlı Baku TV-yə açıqlama verib.

“Gecə güclü partlayış səsi gəldi. Çölə çıxanda gördük ki, hər tərəf yanır. Hadisə yerinə dərhal Fövqəladə Hallar Nazirliyinin, Rayon İcra Hakimiyyətinin və Daxili İşlər Nazirliyinin əməkdaşları cəlb olundu”, – o söyləyib.

Goranboy Rayon Fövqəladə Hallar Komissiyasının sədri Seymur Nazarov bildirib ki, hadisə baş verən andan etibarən aidiyyəti qurumlar tərəfindən təxirəsalınmaz tədbirlər həyata keçirilib:

“Təhlükəsizliyin təmin edilməsi məqsədilə əraziyə yaxın yaşayan əhali dərhal təhlükəsiz yerlərə təxliyə olunub. Hadisə nəticəsində sakinlərin evlərinə və fərdi təsərrüfatlarına dəymiş hər hansı ziyan faktı qeydə alınmayıb”.