Dövlət Təhlükəsizlik Xidməti əcnəbilərlə bağlı hərəkətə keçdi | Əməliyyatın detalları üzə çıxdı

Qanunsuz dini yığıncaqlar təşkil edən əcnəbilər ölkədən çıxarılıb.

Bu barədə Dövlət Təhlükəsizliyi Xidmətindən məlumat verilib.

Belə ki, xarici ölkə vətəndaşlarının Azərbaycan ərazisində qanunvericiliyin tələblərini pozaraq dini təbliğat işi aparmaları ilə bağlı daxil olmuş məlumatlar əsasında Dövlət Təhlükəsizliyi Xidməti və Dövlət Miqrasiya Xidməti birgə tədbir həyata keçirib.

Tədbirlər nəticəsində başqa dövlətin ərazisində yerləşən dini mərkəzin üzvləri olan əcnəbilər – 1968-ci il təvəllüdlü Şeyx Məhəmməd Hənif, 1981-ci il təvəllüdlü Kərim Bux və 1968-ci il təvəllüdlü Çanna Tac Məhəmmədin Azərbaycanda qeyri-ənənəvi dini cərəyana aid ideyaların təbliği istiqamətində fəaliyyət göstərmələri, qanunsuz qapalı dini yığıncaqlar və dini ayinlərin icrasını təşkil etmələri təsbit olunub.

Toplanmış materiallar əsasında adları qeyd olunan xarici ölkə vətəndaşlarının “Dini etiqad azadlığı haqqında” Azərbaycan Qanununun tələblərinə zidd fəaliyyət göstərmələri müəyyənləşdirilərək onların bu əməllərinin qarşısı alınmış və həmin şəxslər Miqrasiya Məcəlləsinin 79.1.2-ci maddəsinə əsasən ölkə hüdudlarından kənara çıxarılıb.