DSX sərhəddə hərəkətə keçdi | Təxribat barədə detallar məlum oldu

İrandan Azərbaycana külli miqdarda narkotik keçirməyə cəhd edən 7 nəfərdən 1-i zərərsizləşdirilib, 3-ü saxlanılıb.

Bu barədə Dövlət Sərhəd Xidmətindən xəbər verilib.

Qeyd olunub ki, aprelin 26-da Dövlət Sərhəd Xidmətinin Sərhəd Qoşunları Komandanlığının “Lənkəran” sərhəd dəstəsinin xidməti ərazisində İrandan Azərbaycan istiqamətində dövlət sərhədini pozmağa cəhd göstərən 7 nəfər naməlum şəxsin hərəkəti sərhəd naryadı tərəfindən müşahidə edilib.

Sərhəd zastavası “Silaha” komandası üzrə qaldırılıb, xidməti ərazi tam qapadılıb. Sərhəd naryadı tərəfindən “Dayan” əmri verilərək sərhəd pozucuları təqib edilib, havaya xəbərdarlıq atəşi açılıb. Lakin sərhəd pozucuları əmrə tabe olmayıb, silahlı müqavimət göstərərək sərhədçilərin həyatına qəsd etmək məqsədilə atəş açıblar.

Sərhəd naryadı tərəfindən Qanunun tələblərinə uyğun silah tətbiq edilərək sərhəd pozucularından biri hadisə yerində zərərsizləşdirilib, silahlı müqavimət göstərən digər 3 nəfər isə geriyə qaçmağa nail olub.

Daxili İşlər Nazirliyinin əməkdaşları ilə birgə keçirilən sərhəd axtarışı və əməliyyat tədbirləri nəticəsində digər 3 nəfər – Balakən rayon sakinləri, 27 yaşlı Rəcəb İbrahimov, 35 yaşlı İsa İsayev və 43 yaşlı Kamran Uzunov saxlanılıb.

Əraziyə baxış zamanı 3 ədəd bağlamada ümumi çəkisi 51 kiloqram 884 qram narkotik vasitəyə bənzər maddə və çox sayda psixotrop həb aşkar olunaraq götürülüb.

Baş vermiş hadisə ilə əlaqədar İranın sərhəd nümayəndələri ilə görüş keçirilib.

Fakt üzrə Dövlət Sərhəd Xidməti və Hərbi Prokurorluq tərəfindən zəruri əməliyyat-istintaq tədbirləri davam etdirilir.