Goranboyda baş verən hadisənin səbəbləri araşdırılır - Baku TV

Goranboy rayonunda azyaşlının ölümü qeydə alınıb.

Hadisə rayonun Yuxarı Ballıqaya kəndində baş verib.

Məlumata görə, fevralın 20-də kənddə peyvənd olunan azyaşlı fevralın 21-də dünyasını dəyişib.

İddialara əsasən, peyvənddən sonra uşağın halı pisləşib və o vəfat edib.

Kənd sakinlərindən biri bildirib:

“Bu məntəqədə fevralın 20-si mənim övladım da rəhmətə gedən uşaqla eyni vaxtda peyvənd olunub, amma heç bir narahatlığı yoxdur. 2-3 gün sonra hadisədən xəbər tutduq. Allah rəhmət etsin”.

Məsələ ilə bağlı Goranboy Rayon Mərkəzi Xəstəxanasından bildirilib ki, 2026-cı il fevralın 20-də 2 aprel 2025-ci il təvəllüdlü azyaşlı Mirzəyev Nihat Yuxarı Ağcakənd tibb məntəqəsində yaşına uyğun rutin profilaktik müayinədən keçirilib və Milli Peyvənd Təqviminə əsasən peyvənd olunub. Ona göyöskürək, difteriya, tetanus, B tipli Haemophilus influenzae və poliomielit infeksiyalarına qarşı 6 komponentli (“Heksaksim”) peyvənd, həmçinin pnevmokok infeksiyasına qarşı peyvəndin ikinci dozası tətbiq edilib.

Qurumun məlumatına görə, peyvənddən sonra azyaşlı müəyyən olunmuş müddət ərzində tibbi müşahidə altında saxlanılıb və hər hansı kəskin allergik reaksiya, anafilaktik əlamət və ya digər klinik dəyişiklik qeydə alınmayıb. Gün ərzində də uşağın səhhəti ilə bağlı narahatlıq müşahidə edilməyib.

Fevralın 21-də saat 13:10 radələrində Yuxarı Ballıqaya kəndindən təcili tibbi yardıma çağırış daxil olub. Təcili tibbi yardım briqadası saat 13:25-də Şəfəq–Qaraçinar ərazisində çağırış edən şəxslərlə qarşılaşıb və azyaşlının ölüm faktını təsdiqləyib. Ölüm hadisəsinin ev şəraitində baş verdiyi bildirilib.

Azyaşlının meyiti ölüm səbəbinin müəyyənləşdirilməsi məqsədilə Məhkəmə-Tibbi Ekspertiza və Patoloji Anatomiya Birliyinə təhvil verilib.

Bildirilib ki, hadisənin zaman intervalı və klinik gedişi anafilaktik reaksiyanın tipik xüsusiyyətlərinə uyğun deyil. Anafilaktik reaksiyalar adətən peyvənddən bir neçə dəqiqə, ən gec isə bir neçə saat sonra inkişaf edir və kəskin klinik əlamətlərlə müşayiət olunur. Mövcud məlumatlara əsasən, ölümün anafilaktik reaksiya ilə əlaqəsi təsdiqlənməyib.

Qeyd edək ki, vəfat edən azyaşlı ailənin yeganə övladı olub. Hadisənin başvermə səbəbləri araşdırılır.