Həyatlarını qurban verən polislərimizin fədakarlığı | Şüvəlandakı atışmanın detalları

Paytaxtın Xəzər rayonu, Şüvəlan qəsəbəsində əvvəllər dəfələrlə məhkum olunmuş, axtarışda olan 38 yaşlı Allahverdiyev Rövşən Oqtay oğlu 3-ü polis,1-i mülki olmaqla ümumilikdə 4 şəxsi qətlə yetirib.

Belə ki, Rövşən Allahverdiyev polis əməkdaşları tərəfindən saxlanılarkən silahlı müqavimət göstərib, açdığı atəşlə Eldəniz Məmmədov, Mahir Ağayev və Mirəli Heydərovun həyatına son qoyub. O, polis əməkdaşlarına mane olmaq məqsədilə ailə üzvlərini önə verməkdən də çəkinməyib.

Cavab tədbirlərindən yayınmaq üçün ailə üzvlərini sipər etməsi də təsadüfi deyil. Burada hər kəsin bildiyi və keçmiş məhkumun da çox yaxşı dərk etdiyi bir məqam var. O da Azərbaycan polisinin ədaləti və günahsız mülki vətəndaşlara qarşı sərgilədiyi vicdanlı mövqeyidir ki, bunun da nəticəsində polis əməkdaşları cinayətkara atəş açmadılar. Özləri isə faciəvi şəkildə həlak oldular.

Əslində isə bir çox dövlətlərdə polisin bu cür məqamlarda necə davranacağı hər kəsə bəllidir. Məsələn, elə ABŞ-də polis o şəxsin ətrafında olan mülki vətəndaşları da göz qırpmadan öldürə və o cinayətkarı elə yerindəcə zərəsizləşdirərdi. Lakin Azərbaycan polisi bunu etmədi, onlar günahsız insanlara qıymadılar. Onların müdafiəsi uğrunda öz canlarını fəda etdilər.