Prorektorun qətli ilə bağlı məhkəmə başlayıb | Yeni detallar açıqlandı

“Elm və Təfəkkür Universiteti”nin prorektoru Tariyel Əhmədovun qətlə yetirilməsinə görə saxlanılan Müşviq Atakişiyev, Dəyanət Quliyev və Samir Quliyevin cinayət işinin ilk məhkəmə hazırlıq iclası keçirilib.

Bakı Ağır Cinayətlər Məhkəməsinin hakimi Səyavuş Hacıyevin sədrliyi ilə keçirilən proses zamanı təqsirləndirilən şəxslərin anket məlumatları dəqiqləşdirilib.

Qeyd edək ki, Tariyel Əhmədov 2011-ci ilin 16 sentyabrında Yasamal rayonu ərazisində yaşadığı evin yaxınlığındakı idman meydançasında küt alətlə qətlə yetirilib. Onun qətlində sifarişçi kimi şübhəli bilinən Müşviq Atakişiyev “Elm və Təfəkkür Universiteti”nin təsisçilərindən biri və rektoru olmaqla yanaşı, Azərbaycan Milli Elmlər Akademiyasının İqtisadiyyat institutunda içraçı direktor vəzifəsində çalışıb. İttiham aktına görə o, təsisçi yoldaşını qətlə yetirməyi həmyerlisi Dəyanət Quliyevə sifariş verib. Dəyanət Quliyev də öz növbəsində qətli həyata keçirməyi 40 min ABŞ dolları müqabilində taksi sürücüsü olan həmkəndlisi Samir Quliyevə tapşırıb.

Məhkəmədə anket məlumatları dəqiqləşdirilərkən məlum olub ki, qətlə görə killer sifariş etməkdə şübhəli bilinən Dəyanət Quliyev həmin müddət ərzində Binəqədi rayon polis İdarəsinin 7-ci polis bölməsinin əməliyyatçısı olub. 2022-ci ildə isə təqaüdə çıxıb.

Müşviq Atakişiyev və Dəyanət Quliyev Cinayət Məcəlləsinin sifarişlə adam öldürməkdə təşkilatçı, Samir Quliyev isə həmin Məcəllənin sifarişlə adam öldürmə maddəsi ilə təqsirləndiriliblər. Cinayət işinin ilk baxış iclası yanvarın 17-nə təyin olunub.