Prorektorun qətlini sifariş verən keçmiş rektora ağır cəza verildi

Keçmiş “Elm və Təfəkkür Universiteti”nin prorektoru Tariyel Əhmədovun öldürülməsində təqsirləndirilən həmin universitetin rektoru Müşfiq Atakişiyev, Dəyanət Quliyev və Samir Quliyevin cinayət işi üzrə məhkəmənin son prosesi keçirilib.

Bakı Ağır Cinayətlər Məhkəməsində hakim Siyavuş Hacıyevin sədrliyi ilə keçirilən iclasda hökm oxunmamışdan öncə təqsirləndirilən professora son söz verilib.

Müşfiq Atakişiyev çıxışı zamanı onun barəsində irəli sürülmüş ittihama etirazını bildirib. O, barəsində Cinayət Məcəlləsinin 120-ci (qəsdən adam öldürmə) maddəsi ilə cinayət işinin açılmasını əsassız sayıb.

İttiham tərəfinin hər üç təqsirləndirilən şəxsə 15 il cəza istəməsinə gəlincə isə Müşfiq Atakişiyev bunu cahil ilə ziyalı arasında fərq qoyulmaması kimi qiymətləndirib. Qısa müşavirədən sonra hökm oxunub.

İttihama görə, “Elm və Təfəkkür Universiteti”nin prorektoru Tariyel Əhmədovun 16 sentyabr 2011-ci il tarixdə qəsdən öldürülməsi faktı ilə bağlı cinayət işi üzrə başlanan istintaq-əməliyyat tədbirləri nəticəsində təqsirləndirilən Müşfiq Atakişiyev, Dəyanət Quliyev və Samir Quliyev Cinayət Məcəlləsinin bir neçə maddəsi ilə məsuliyyətə cəlb olunaraq barələrində həbs qətimkan tədbiri seçilib.