Qəzanın baş verməməsi üçün sürücülər nələrə diqqət etməlidir? - Baku TV

Dekabrın 8-də Abşeron rayonu, Qobu qəsəbəsi ərazisində yol-nəqliyyat hadisəsi baş verib. Yağışlı hava şəraitində yük maşınının sürücüsü avtomobilin idarəetməsini itirərək, qarşıdan gələn minik maşınına çırpılıb.

Hadisə nəticəsində minik maşınının sürücüsü və avtomobildə olan 1 sərnişin həyatını itirib, digər sərnişin isə müxtəlif dərəcəli bədən xəsarətləri alıb.

Son dövrlərdə yollarda bu tip qəzaların sayının artması müşahidə edilir.

Nəqliyyat eksperti Elməddin Muradlının sözlərinə görə, yol şəraiti qəzaya səbəb olan amillərdən biridir. Ekspert Qobuda baş verən qəzanın yük avtomobilinin sürücüsünün qeyri peşəkar olması, yağışlı hava, sürüşkən yol və yüksək sürət həddi ilə əlaqəli olduğunu bildirib.

Baş Dövlət Yol Polisi İdarəsinin baş inspektoru Elvin Hacıyev isə asfalt örtüyü yaş olanda sürət həddinin minimuma endirilməli olduğunu vurğulayıb.

O əlavə edib ki, ara məsafəsi normadan artıq saxlanılmalı, avtomobil texniki cəhətdən saz vəziyyətdə idarə edilməli, şinlər mövsümə uyğun olmalıdır:

"Xarici işıq cihazları, şüşə silgəcləri tam işlək vəziyyətdə olmalıdır ki, sürücü rahat və təhlükəsiz şəkildə hərəkət edə bilsin. Həmçinin piyadalar da hava şəraitinin çətin və təhlükəli olduğunu nəzərə alaraq daha ehtiyatlı olmalıdırlar. Unutmaq olmaz ki, asfalt örtüyünün yaş olması qəzaların baş verməsi üçün daha əlverişli şərait yaradır".