"Bununla öldürmək olardı?!" - Arvadı Nüşabəni öldürən əfqanıstanlıdan dəhşətli etiraflar - Baku TV

Bakıda həyat yoldaşını qətlə yetirməkdə və ona qısqandığı taksi sürücüsünü öldürməyə cəhd etməkdə təqsirləndirilən Əfqanıstan vətəndaşı Samandar Səfayinin cinayət işi üzrə məhkəmə baxışı keçirilib.

Bakı Ağır Cinayətlər Məhkəməsində hakim Nigar İmanovanın sədrliyi ilə baş tutan prosesdə təqsirləndirilən şəxsin sərbəst ifadəsi dinlənilib. Samandar Səfayi ifadəsində Əfqanıstan vətəndaşı olduğunu, 90-cı illərdə Azərbaycanda məskunlaşaraq Nüşabə adlı qadınla ailə həyatı qurduğunu və iki övladının olduğunu deyib.

Təqsirləndirilən şəxs həyat yoldaşının davranışlarından şübhələnərək onun harada olduğunu soruşsa da, o, mağazaların birinin adını çəkərək orada olduğunu deyib. Samandar həmin yerə gedib onu görməyib və həmin gün o, bir neçə dəfə bu qayda ilə müxtəlif yerlərə baxsa də, həyat yoldaşını tapa bilməyib. Sonda onunla evin yaxınlığında rastlaşıb.

O, evdə yaranmış mübahisə zamanı həyat yoldaşını öldürdükdən sonra arvadı ilə birlikdə gördüyü taksi sürücüsü Canmirzə Cabbarovun olduğu yerə gedib. Ona da divar kağızı bıçağı ilə ağır xəsarət yetirdiyini etiraf edib.

Qeyd edək ki, hadisə 2025-ci il iyulun 9-da Binəqədi rayonunda baş verib. Rayon Prokurorluğunda aparılan araşdırmalarla Nüşabə Səfərovanın (Səfayi) qısqanclıq zəminində qətlə yetirilməsi və Canmirzə Cabbarovun öldürülməsinə cəhd edilməsi müəyyən edilib.

Faktla bağlı Samandar Səfayi barəsində Cinayət Məcəlləsinin 120.2.1 (qəsdən adam öldürmə) və 29, 120.2.7-ci (iki və ya daha çox şəxsi öldürməyə cəhd) maddələri ilə cinayət işi başlanılıb.