"Qışqırdım ki, çıxın bayıra..." | Tovuzda qorxunc partlayış: Ailə dəhşət yaşadı - Baku TV

Tovuzda yaşayış evində partlayış olub. Hadisə rayonun Aşağı Quşçu kəndində baş verib.

Hadisə nəticəsində 29 yaşlı Turxan Cəfərzadə, onun həyat yoldaşı 21 yaşlı Turanə Cəfərova və övladları 2 yaşlı Furkan Cəfərov yanıq xəsarətləri ilə xəstəxanaya yerləşdirilib. Onlara yardım edilsə də, vəziyyətlərinin ağır olması ilə bağlı hər üç yaralı Bakıya göndərilib.

“Gecə partlayış səsi eşitdim, elə bildim ki, öz evimdən gəlir. Sonra qonşudan qışqırıq səsi gəldi. Gedib qapını açıb içəri girəndə gördüm ki, gəlinlə oğlunun vəziyyəti ağırdır”, – deyə qonşulardan biri bildirib.

Partlayış nəticəsində ev tamamilə yararsız hala düşüb. Əraziyə Fövqəladə Hallar Nazirliyinin Dövlət Yanğından Mühafizə Xidmətinin Tovuz Rayon Yanğından Mühafizə Hissəsinin qüvvələri cəlb olunub.

Hadisə yerində müvafiq təhlükəsizlik tədbirləri görülüb. Hadisə ilə əlaqədar aidiyyəti qurumlar tərəfindən araşdırma aparılır.