"TikTok"da saxta elanlar yerləşdirən dələduz saxlanılıb

“TikTok” sosial şəbəkəsində bahalı mobil telefonları dəyərindən ucuz qiymətə satdığı barədə elanlar yerləşdirən, müraciət edənlərdən müxtəlif məbləğlərdə beh alan və daha sonra həmin şəxsləri aldadan Nihat Qurbanov tutulub.

Daxili İşlər Nazirliyinin mətbuat xidmətindən verilən məlumata görə, o, ifadəsində bu yolla təqribən 45-50 nəfəri aldatdığını və pul aldığı şəxsləri sonradan onunla əlaqə saxlamamaları üçün bloka atdığını bildirib.

Həyata keçirilən növbəti əməliyyatlar zamanı isə özünü hotel əməkdaşı kimi təqdim edərək taksi sürücülərinə qarşı dələduzluq edən və onların hesabından öz kartına pullar köçürən Əli Dadaşov saxlanılıb. Bu şəxsin də dələduzluq yolu ilə 10-dan artıq taksi sürücüsünü aldatdığı məlum olub.

Paytaxtda polisin həyata keçirdiyi növbəti əməliyyatlar zamanı isə vətəndaşların kartlarındakı pul vəsaitlərini müxtəlif üsullarla ələ keçirən Rüfət Yusifov, Amin və Ramil Əliyev qardaşları tutulublar. Aşkar edilən faktlarla bağlı araşdırmalar davam etdirilir.