Sabirabad Rayon Mərkəzi Xəstəxanası suallardan boyun qaçırdı | Araşdırılma aparılır

Son 10 gün ərzində Sabirabad Rayon Mərkəzi Xəstəxanasında üç uşaq ölümü qeydə alınıb.

TƏBİB-dən verilən məlumata görə, Sabirabad Rayon Mərkəzi Xəstəxanasının nəzdində olan Perinatal Mərkəzə martın 23-də 2005-ci il təvəllüdlü 38-39 həftəlik hamilə hospitalizasiya olunub. Zəruri tibbi yardım göstərilən pasiyentin bətnindən ölü döl xaric olunub.

Növbəti gün isə 1988-ci il təvəllüdlü 28-29 həftəlik hamilə uşaqlıqda iki dəfə çapıq, ağır dərəcəli preeklampsiya diaqnozu ilə hospitalizasiya olunub. Qeysəriyyə kəsiyi əməliyyatı ilə körpə dünyaya gəlib. Vəziyyəti ağır olan ekstremal azçəkili dölün aparılan reanimasiya tədbirlərinə baxmayaraq, ölüm faktı qeydə alınıb.

Digər 39-40 həftəlik hamilə olan 2006-cı il təvəllüdlü şəxs isə hospitalizasiya olunub. Zəruri tibbi yardım göstərilən pasiyentin bətnindən ölü döl xaric olunub.

Qeyd edilib ki, hər üç zahının müalicələri tibb müəssisəsinin müvafiq şöbələrində davam etdirilib, hazırda vəziyyətləri stabildir. Baş Prokurorluqdan bildirilib ki, hadisələrlə bağlı Sabirabad Rayon Prokurorluğunda araşdırma aparılır.