Şəkidəki dəhşətli qəzanın şahidi hadisə anından danışdı

Avqustun 18-də axşam saatlarında baş verən qəza zamanı dünyalarını dəyişən bir ailənin 4 üzvü, Şəki şəhər sakinləri, 34 yaşlı Nicat Mirzəyev, onun 3 övladı – 11 yaşlı Nuray Mirzəyeva, 10 yaşlı Aysun Mirzəyeva və 2 yaşlı Uğur Mirzəyev avqustun 19-da Şəki şəhərində torpağa tapşırılıblar.

Qəzada ağır xəsarət alaraq sağ qalan uşaqların anası 31 yaşlı Qızxanım Mirzəyeva isə xəstəxanaya yerləşdirilib. Ailə yaxınlarından verilən məlumata görə, Nicat ailəsi ilə birlikdə Bakı şəhərindən Şəkiyə gəlirmiş. Onlar Bakıdan məktəb ləvazimatları alaraq Şəkiyə qayıdan zaman hadisə baş verib.

Hadisə şahidi Yusif İsgəndərlinin sözlərinə görə, qəzadan sonra 3 nəfər yerində ölüb, bacılardan biri daha sonra dünyasını dəyişib. Qəzanın baş verdiyi yerdə isə əyləc izləri olub. Hadisəyə səbəb kimi Nicat Mirzəyevin sükan arxasında yuxulaması və yüksək sürət göstərilir. Qeyd edək ki, sürücü Nicat Mirzəyev evin tək oğul övladı olub. Faktla bağlı araşdırma aparılır.