Sərhədpozucuların planı baş tutmadı | DSX-dən əməliyyat barədə detallar

Azərbaycandan keçməklə qanunsuz yolla Avropa ölkələrinə getmək istəyən sərhədpozucuları saxlanılıb.

Məlumatı Dövlət Sərhəd Xidməti yayıb.

Xidmət əməkdaşlarının keçirdiyi sərhəd axtarışı və əməliyyat tədbirləri nəticəsində 4 sərhəd pozucusu tutulub.

Belə ki, aprelin 30-da Dövlət Sərhəd Xidmətinin Sərhəd Qoşunları Komandanlığının “Lənkəran” sərhəd dəstəsinin xidməti ərazisində iki nəfər – 1996-cı il təvəllüdlü Safi Hedayatullah Eynətullah və 2004-cü il təvəllüdlü Mirzay Mohsin Səfiulla, mayın 2-də isə daha iki nəfər Əfqanıstan vətəndaşı – 1999-cu il təvəllüdlü Əfqan Mohammadəmin Mominxan və 2005-ci il təvəllüdlü Əhmədi Əhməd Abdullah dövlət sərhədini pozmağa cəhd göstərib.

Araşdırma nəticəsində saxlanılan şəxslərin Azərbaycan ərazisindən tranzit keçməklə qanunsuz yolla Avropa ölkələrinə miqrasiya etmək niyyətində olduqları müəyyən edilib.

Faktlar üzrə əməliyyat-istintaq tədbirləri davam etdirilir.