AVRO-2024-ün seçmə mərhələsində növbəti görüşlər olub

AVRO-2024-ün seçmə mərhələsində 5-ci turun görüşləri olub.

B qrupunun lideri Fransa millisi Parisdə inamlı qələbə qazanıb. İrlandiya yığmasını qəbul edən kollektiv Orelyen Tçuameni və Markus Türamın qolları ilə 2-0 hesabı ilə güclü olub.

Bu qrupun digər matçında Niderland və Yunanıstan futbolçuları qarşılaşıb. Eyndhoven şəhərində baş tutan matç “narıncılar”ın 3-0 hesablı qalibiyyəti ilə yekunlaşıb. Komandanın qollarını Marten de Ron, Kodi Qakpo və Vaut Veqorst vurub. Bu nəticələrdən sonra Fransa seçməsi 15 xalla qrupa başçılıq edir. Niderland və Yunanıstan milliləri 2-ci, 3-cü yerləri bölüşdürürlər. İrlandiya və Cəbəllütariq isə müvafiq olaraq 4-cü 5-ci pillələrdədir.

Gecənin böyük hesablı qələbələrindən biri Kopenhagendə qeydə alınıb. San-Marino yığmasını qəbul edən Danimarka komandası 4 cavabsız topla qalib gəlib. Skandinaviyalıların qolları Höybyerq, Mele, Vind və Eriksenin aktivindədir.

H qrupunun digər oyununda isə Sloveniya kollektivi Şimali İrlandiya seçməsini 4-2 hesabı ilə məğlub edib. 5-ci turu qələbə ilə tamamlayan Danimarka və Sloveniya hərəyə 10 xalla 2-ci, 3-cü yerləri bölüşdürürlər.

Komandalar lider Finlandiyadan 2 xal geri qalır. 5 matçdan sonra 9 xalı olan Qazaxıstan millisi 4-cü yerdədir. 3 xalı olan Şimali İrlandiya yığması və bütün görüşlərdə uduzan San-Marino isə 5-ci, 6-cı pillələrdədir.