Cüdo millimiz “Böyük Dəbilqə” yarışında uğurla çıxış edib

Gürcüstanda keçirilən cüdo üzrə “Böyük Dəbilqə” turniri millimiz üçün uğurlu alınıb. Təmsilçilərimiz Tbilisidəki yarışı 4 medalla tamamlayıblar.

İdmançılarımızdan 90 kq çəkidə çıxış edən Elcan Hacıyev finala gedən yolda Böyük Britaniya, Kuba, Slovakiya və Koreya nümayəndələrinə qalib gəlib. Həlledici görüşdə yerli Laşa Bekauri ilə qarşılaşan Elcan uduzaraq gümüş mükafatla kifayətlənib.

100 kq-dan yuxarı çəkidə mübarizə aparan Uşanqi Kokauri də yarışı 2-ci pillədə başa vurub. Ardıcıl olaraq Monako, Özbəkistan, Gürcüstan və Kuba cüdoçularından güclü olan Uşanqi finalda yerli Quram Tuşişviliyə məğlub olaraq gümüş medala yiyələnib.

Qeyd edək ki, daha əvvəl “Böyük Dəbilqə” turnirində təmsilçilərimizdən Balabəy Ağayev 60, Ruslan Paşayev isə 66 kq çəkidə bürünc mükafat qazanıb. Balabəy 3-cü yer uğrunda qarşılaşmada gürcüstanlı Georgi Sardalaşviliyə, Ruslan isə italiyalı Matteo Pirasa qalib gəlib.