İngiltərə çempionatı: "Tottenhem" və "Nyukasl" 15-ci turda uduzub

İngiltərə çempionatında 15-ci turun son 2 görüşü gözlənilməz nəticələrlə diqqət çəkib.

Mövsümə yaxşı başlasa da, son matçlarda ardıcıl xal itirən “Tottenhem” “Vest Hem”i qəbul edib. “Tottenhem Hotspur Stedium”da keçirilən London derbisində hesabı 11-ci dəqiqədə “mahmızlar” açıblar.

Kristian Romeronun qolu sayəsində “Tottenhem” fasiləyə irəlidə yollanıb. Ancaq “çəkicdöyənlər” dönüş edə biliblər. Əvvəlcə 52-ci dəqiqədə Cared Boeun hesabı bərabərləşdirib. 74-cü dəqiqədə isə Ceyms Uord-Prauz “Vest Hem”ə qələbə qazandıran qolun müəllifi olub. 2-1 hesabı ilə güclü olan “Vest Hem” 9-cu pillədə qərarlaşıb. 5 oyundur qalibiyyətə həsrət olan “Tottenhem” isə 27 xalla 5-ci yerdədir.

Digər görüşdə “Nyukasl” səfərdə autsayderlərdən “Everton”a gözlənilmədən böyük hesabla uduzub. “Qudison Park”da baş tutan qarşılaşmada bütün qollar 2-ci yarıda qeydə alınıb. Duayt Maknil, Abdulay Dukure və Betunun topları ilə mersisaydlılar 3-0 hesabı ilə qalib gəliblər.

Federasiyanın qərarına əsasən, 10 xalı silinən “Everton” hazırda 10 xalla 17-ci yerdədir. “Nyukasl” isə 26 xalla 7-ci pillədədir.