"Tottenhem" və "Mançester Siti"nin uğursuz seriyası bitib

İngiltərə çempionatında 16-cı turun son matçlarında maraqlı nəticələr qeydə alınıb.

Diqqət mərkəzində olan əsas görüşdə “Tottenhem” “Nyukasl”ı darmadağın edib. Londondakı qarşılaşmanın ilk hissəsini “mahmızlar” Udogi və Rişarlisonun qolları sayəsində 2-0 hesabı ilə öndə tamamlayıblar. Fasilədən sonra Rişarlison dublunu rəsmiləşdirib. 85-ci dəqiqədə isə Son Hön-Min 11 metrlik cərimə zərbəsindən hesabı 4-0 edib.

“Nyukasl” bu qollardan yalnız birinin əvəzini çıxıb. “Sağsağanlar”dan Joelinqton fərqlənib. “Tottenhem” – “Nyukasl”: 4-1. Ötən turda “Nyukasl”a 3-0 hesabı ilə qalib gələn “Everton” bu dəfə “Çelsi”ni məğlub edib. Federasiyanın qərarına əsasən 10 xalı silinən mersisaydlılar “Qudison Park”da Abdulay Dukure və Lyuis Dobbinin topları ilə 2-0 hesabı ilə güclü olublar.

Daha bir gözlənilməz nəticə “Fulhem” və “Vest Hem” arasında London derbisində qeydə alınıb. “Kreyven Kottec” stadionundakı görüşün ilk hissəsini Raul Ximenes, Villian və Tosin Adarabioyonun qolları ilə 3-0 hesabı ilə öndə tamamlayan “Fulhem” 2-ci yarıda Harri Vilson və Karlos Vinisiusun dəqiq zərbələrindən sonra ümumən 5-0 hesablı qələbə qazanıb. “Mançester Siti” isə 16-cı turda çempionatdakı qələbəsiz seriyasını sonlandıra bilib. “Luton Taun”un qonağı olan “şəhərlilər” Adebayonun qolundan sonra fasiləyə geridə yollansalar da, 2-ci yarıda Bernardu Silva və Cek Qrilişin topları ilə 2-1 hesablı qələbə qazanıblar.

Hazırda Premyer liqanın yarış cədvəlinə 37 xalla “Liverpul” başçılıq edir. 1 xal az toplayan “Arsenal” 2-ci, 35 xalı olan “Aston Villa” isə 3-cü yerdədir.