İspaniya superkuboku: "Real Madrid" - "Atletiko" matçı

İspaniya superkubokunda ilk finalçı müəyyənləşib.

Dördlər finalı formatında keçirilən yarışın 1-ci yarımfinalında “Real Madrid” və “Atletiko” üz-üzə gəlib.

Görüşə baş məşqçi Dieqo Simeonenin futbolçuları yaxşı başlayıblar. 6-cı dəqiqədə Mario Ermoso “Atletiko”nu irəli çıxarıb.

“Real”ın cavabı 20-ci dəqiqədə gəlib. Antonio Rüdiger hesabı bərabərləşdirib. Bir qədər sonra Ferlan Mendi “kral klubu”na üstünlük qazandırıb. Bununla belə, “Atletiko” Qrizmanın qolu ilə fasiləyədək tarazlığı bərpa edib: 2-2.

2-ci yarıda tərəflər hərəyə 1 dəfə fərqləniblər. 78-ci dəqiqədə Rüdigerin avtoqolundan sonra hesab 3-2 olsa da, 85-ci dəqiqədə Dani Karvaxal yenidən bərabərliyi təmin edib: 3-3.

Əsas vaxt bu hesabla yekunlaşdığı üçün əlavə 30 dəqiqə oynanılıb. Burada isə 116-cı dəqiqədə Xoselunun qolu ilə önə çıxan “los blankos” 6 dəqiqə sonra Braim Diasın dəqiq zərbəsi ilə qələbəni təmin edib. “Real Madrid” – “Atletiko”: 5-3.

Finala yüksələn “Real” həlledici matçda “Barselona” – “Osasuna” cütünün qalibi ilə qarşılaşacaq.