İtaliya kuboku - “Latsio” - “Roma” matçında 3 qırmızı vərəqə göstərildi

11 yanvar 2024

Futbol üzrə İtaliya kubokunda 1/4 final mərhələsinin növbəti görüşləri olub.

Diqqət mərkəzində olan oyunda “Latsio” və “Roma” komandaları üz-üzə gəliblər. Roma derbisi gözlənildiyi kimi gərgin mübarizə şəraitində keçib. Qarşılaşmanın sonlarında baş hakim Daniele Orsato “byankoselesti”dən Pedro, “canavarlar”dan isə Sərdar Azmun və Canluka Mançiniyə qırmızı vərəqə göstərib. Matçın taleyini isə Mattia Dzakkanyinin 51-ci dəqiqədə penaltidən vurduğu yeganə qol həll edib. “Latsio” – “Roma”: 1-0.

Digər görüşdə “Milan” və “Atalanta” klubları münasibətlərə aydınlıq gətiriblər. Oyunda hesabı Rafael Leaunun qolu ilə “rossoneri” açsa da, Berqamo təmsilçisi Tön Kopmeynersin topu ilə fasiləyədək tarazlığı bərpa edib: 1-1. 2-ci yarıda isə Kopmeyners daha bir qol vuraraq komandasına qalibiyyət gətirib.

Bütün yarışlarda 6 matçdan sonra uduzan “Milan” kubokla vidalaşıb. 2-1 hesablı qələbə qazanan “Atalanta” isə yarımfinalda "Fiorentina"ya rəqib olub.

#İtaliya kuboku