İtaliya kubokunda final matçı keçirilib

İtaliya kubokunda qalibin adına aydınlıq gəlib.

Romanın “Olimpiko” arenasında keçirilən matçda “Atalanta” və “Yuventus” üz-üzə gəliblər.

Görüşdə hesab erkən açılıb. Duşan Vlahoviç 4-cü dəqiqədə “byankoneri”yə üstünlük qazandırıb: 1-0. İlk hissə bu hesabla yekunlaşıb.

Fasilədən sonra “Atalanta” təzyiqi artırıb. Ancaq baş məşqçi Can Pyero Qasperininin əvəzetmələri nəticə verməyib. Müdafiədə diqqətli oynayan “Qoca Sinyora” sərfəli hesabı qorumağı bacarıb. Nəticədə “Yuventus” 3 ildən sonra İtaliya kubokunun qalibi olub. Ümumilikdə tarixində 15-ci dəfə bu yarışda qələbə qazanan Turin təmsilçisi bu baxımdan rekordun sahibidir.

Qeyd edək ki, komandanın bu turnirdəki qələbəsinə baxmayaraq, “Yuventus” rəhbərliyi baş məşqçi Massimiliano Alleqri ilə vidalaşmağa hazırlaşır. Son xəbərlərə görə, bu posta “Bolonya” ilə Çempionlar liqasına vəsiqə əldə edən Tyaqo Motta gətiriləcək.