Sonunculuqdan ilk pilləyə: İspaniya çempionatında lider dəyişikliyi

La liqanın 6-cı turunda “Atletiko”ya uduzan “Real Madrid” bu dəfə “Santyaqo Bernabeu”da “Las Palmas”ı qəbul edib.

“Kral klubu”nun üstünlüyü şəraitində keçən görüşdə hesab fasilə ərəfəsində açılıb. Braim Diaz “los blankos”u irəli çıxarıb. Fasilədən sonra Xoselu qonaqları 2-ci dəfə oyuna mərkəzdən başlamağa məcbur edib. Qalan vaxtda sərfəli nəticəni qoruyan “Real” 2-0 hesablı qələbə qazanıb.

Turun digər matçında “Real Sosyedad” səfərdə “Valensiya”nı məğlub edib. 10 sarı və 1 qırmızı vərəqənin göstərildiyi qarşılaşmada san-sebastyanlılar Karlos Fernandesin yeganə qolu sayəsində 3 xalı aktivlərinə yazıblar.

Gecənin daha bir görüşündə mövsümə uğurla başlayan “Jirona” kollektivi “Vilyarreal”ın qonağı olub. 3 qolun vurulduğu oyunda hesabı meydan sahibləri açsa da, “Jirona” Dovbik və Qarsiyanın qolları ilə dönüş edərək 2-1 hesabı ilə qalib gəlib.

Bu qələbə sayəsində “Jirona” La liqada liderliyə yüksəlib. Komanda 2-ci yerdəki “Real”ı 1, 3-cü pillədəki “Barselona”nı isə 2 xal qabaqlayır.