107 QHT Azərbaycana COP29-la bağlı dəstək bəyanatı verdi

Sağlamlıq, ətraf mühit və iqlim dəyişmələri məsələləri üzrə ixtisaslaşmış, ümumilikdə 106 ölkədən 2300 QHT-ni özündə birləşdirən Afrika Səhiyyə Təşkilatları Assosiasiyası – AHOA Azərbaycana COP29-la bağlı dəstək bəyanatı verib.

Bəyanatı təşkilatın rəhbəri Uzodinma Adiriece imzalayıb. AHOA-ya üzv və tərəfdaş olan 30 ölkədən 107 QHT də müraciətə qoşulub.

Bəyanatda AHOA Azərbaycanın iqlim dəyişmələri ilə bağlı qlobal fəaliyyətdə nümayiş etdirdiyi həqiqi fədakarlığı və liderliyi alqışlayıb, bütün dünyanı iqlim dəyişikliyinə qarşı mübarizə aparmaq üçün COP29-un yaratdığı tarixi fürsətdən istifadə etməyə çağırıb.

“Azərbaycanda keçiriləcək COP29 yaxınlaşdığı dövrdə Afrika Səhiyyə Təşkilatları Assosiasiyasının rəhbərliyi, üzvləri və tərəfdaşları olaraq qlobal ictimaiyyəti dayanıqlı və sağlam gələcəyə doğru istiqamətləndirmək kimi mühüm vəzifəni öhdəsinə götürən COP29 prezidentinə və ev sahibliyi edən Azərbaycana ürəkdən dəstəyimizi ifadə edirik”, – deyə bəyanatda qeyd olunub.