Mikayıl Cabbarov "Euronews Turkish"in suallarını cavablandırdı

“Bizim enerji tərəfdaşlığımız möhkəmlənir və SOCAR beynəlxalq miqyasda daha böyük oyunçuya çevrilir”.

Bu barədə Azərbaycanın iqtisadiyyat naziri Mikayıl Cabbarov “Euronews Turkish” telekanalına müsahibəsi zamanı bildirib.

Nazir həmçinin Azərbaycan Respublikası Dövlət Neft Şirkəti SOCAR-ın regional və qlobal enerji bazarında getdikcə daha çox nüfuz qazandığını vurğulayıb.

O qeyd edib ki, Suriya Azərbaycanın təbii qaz tədarük etdiyi 14-cü ölkə olub.

Təbii qaz nəqlini Suriyanın yenidən qurulması və normal vəziyyətə düşməsi prosesinə əhəmiyyətli töhfə kimi xarakterizə edən M.Cabbarov əlavə edib ki, iqtisadiyyatın normallaşması üçün etibarlı enerji təchizatı həlledici əhəmiyyət kəsb edir. Azərbaycan qazı elektrik enerjisinin daha stabil istehsalını təmin edəcək və milyonlarla insanın tələbatını ödəyəcək.

Nazir bu addımın təkcə kommersiya deyil, həm də diplomatik əhəmiyyət daşıdığını vurğulayıb.

Digər qonşu ölkələrin Suriyanın yenidən qurulmasına dəstək vermə potensialı barədə suala cavabında isə M.Cabbarov bildirib ki, biz öz adımızdan hərəkət edirik, lakin töhfə vermək istəyən digər ölkələrin də səylərini alqışlayırıq.

Qeyd edək ki, avqustun 2-də Türkiyə-Suriya təbii qaz boru kəmərinin açılışı ilə Azərbaycandan təbii qazın Kilis vasitəsilə Suriyaya ixracı başlayıb.