Qarabağ Dirçəliş Fondunun təşkilatçılığı ilə panel görüş keçirildi

Qarabağın bərpası və reinteqrasiyası istiqamətində atılan mühüm addımların təhlili məqsədilə, 5-ci Azərbaycan Beynəlxalq Sərgisi çərçivəsində Qarabağ Dirçəliş Fondunun təşkilatçılığı ilə xüsusi panel görüş keçirilib. "Qarabağın dirçəlişi və Azərbaycanın yeni inkişaf modeli" mövzusunda baş tutan tədbirdə əsas diqqət işğaldan azad olunmuş ərazilərə həsr olunan "Böyük Qayıdışa dair I Dövlət Proqramı"na yönəldilib. İqtisadi İslahatların Təhlili və Kommunikasiya Mərkəzinin icraçı direktoru Vüsal Qasımlının açıqlamasına görə, indiyədək bu proqram çərçivəsində artıq 21,5 milyard manat vəsait xərclənib. Paneldə ərazilərin dünya iqtisadiyyatına inteqrasiyası yolları, müasir şəhərsalma prinsipləri və dövlət-özəl tərəfdaşlığının praktik mexanizmləri müzakirə edilib.