Qarabağda canlanma: SOCAR Cəbrayılda yanacaqdoldurma məntəqəsi açıb
İşğaldan azad edilən ərazilərdə aparılan yenidənqurma və bərpa işlərinə dəstək məqsədilə Şərqi Zəngəzurda, Cəbrayıl rayonunun Şükürbəyli kəndində “SOCAR” brendli modul tipli növbəti yanacaqdoldurma stansiyası istifadəyə verilib.
Stansiya Şükürbəyli-Cəbrayıl-Hadrut avtomobil yolundan istifadə edən avtonəqliyyat vasitələri üçün əlverişlidir. Bu yol Füzuli, Cəbrayıl və Zəngilan rayonlarının ərazisindən keçir və başlanğıcını Horadiz-Cəbrayıl-Zəngilan-Ağbənd avtomobil yolundan götürür.
Standart, Premium və “Dizel” markalı yanacaq məhsullarının satışının həyata keçiriləcəyi stansiyada 2 yanacaqpaylayıcı çən quraşdırılıb. Bununla da 2 kiçik və iritutumlu avtonəqliyyat vasitələrinin yanacaqla təmin edilməsi üçün müvafiq şərait yaradılıb.
Qeyd edək ki, yeni stansiya “Heydər Əliyev İli” çərçivəsində istifadəyə verilən sayca 7-ci YDS-dir. Bununla da Qarabağ və Şərqi Zəngəzur iqtisadi rayonlarında SOCAR brendli YDS-lərin sayı 6-ya, ümumilikdə isə ölkə ərazisində 53-ə çatdırılıb.