Bakıda keçiriləcək sərgidə dünyanın müdafiə sənayesi şirkətləri toplaşacaq - Baku TV

“ADEX 2026” sərgisində 46 ölkədən 170-dən çox şirkətin və 45 xarici rəsmi nümayəndə heyətinin iştirakı təsdiqlənib.

Bu barədə Müdafiə Sənayesi Nazirliyinin nümayəndəsi Gülsüm Rzayeva bildirib.

Onun sözlərinə görə, yüksəksəviyyəli xarici nümayəndə heyətlərinin sərgidə iştirakı ikitərəfli əlaqələrin qurulması və mövcud əməkdaşlığın inkişaf etdirilməsi, eləcə də yeni tərəfdaşlıqların yaradılması üçün mühüm imkanlar yaradacaq.

Gülsüm Rzayeva ADEX 2026-da ABŞ şirkətlərinin fəal iştirakını da xüsusi vurğulayıb.

O qeyd edib ki, "SIG SAUER" və “Lockheed Martin” də daxil olmaqla bir sıra ABŞ şirkətləri sərgidə iştirakını təsdiqləyib. Almaniya da sərginin iştirakçı ölkələri sırasına qoşulacaq.

Bundan əlavə, ADEX 2026-da 14 ölkənin milli pavilyonla iştirakı nəzərdə tutulur. Azərbaycanla yanaşı, ABŞ, Belarus, Böyük Britaniya və Şimali İrlandiya Birləşmiş Krallığı, Çexiya, Çin, İsrail, İtaliya, Özbəkistan, Pakistan, Rumıniya, Slovakiya, Rusiya və Türkiyə milli pavilyonla təmsil olunacaq.