Belə gəlin-qayınana heç yerdə görməmisiniz | "İnşallah, atam bunları görməz” - ARZUNUN VAXTI

“Arzunun vaxtı” verilişinin yeni buraxılışında qayınana-gəlin münasibətləri müzakirə edilib.

Proqramda qayınana Cəlalə Sultanova ilə gəlin Səma Sultanlının arasındakı səmimi münasibət tamaşaçılara təqdim edilib.

Səma Sultanlı qayınanası ilə dost ola bildiyini, onunla eyni evdə yaşamaqdan məmnun olduğunu bildirib:

“Mən naxçıvanlıyam. Bizdə valideynlər övladlarına qarşı bir az da olsa məsafə qoyur. Amma bu ailəyə gəlin gələndə başqa münasibət gördüm. Qayınanama desəm, mənə canını verər. Məni çox əzizləyir, tez-tez öpüb-qucaqlayır”.

Cəlalə Sultanova isə əvvəlki qayınanaların gəlinə qarşı davranışlarını bəyənmədiyini söyləyib:

“Köhnə düşüncəli qayınanalarla yola gedə bilmərəm. Onların tələblərini, hökmlü hərəkətlərini başa düşmürəm. “Mən evdəyəmsə, gəlin qarşımda çay içməməlidir, harasa icazə alıb getməlidir” kimi fikirləri qəbul etmirəm”.