Ermənistanın raket hücumunda şəhid olan Bərdə sakininin ailəsi danışdı

Bərdə Vətən müharibəsi zamanı ən çox atəşə məruz qalan şəhərlərdən biri olub.

Ermənistan silahlı qüvvələri beynəlxalq hüququn norma və prinsiplərini, eləcə də elan edilən humanitar atəşkəs rejiminin tələblərini kobud şəkildə pozaraq dinc əhalini dəfələrlə hədəfə alıb.

Oktyabrın 28-də şəhər sakinlərinin sıx hərəkətdə olduğu və ticarət obyektlərinin kompakt yerləşdiyi əraziyə iki raket zərbəsi endirilib.

Terror qurbanlarından biri də Qızıl Aypara Cəmiyyətinin əməkdaşı Məhərrəm Mustafayev olub.

Şəhidin oğlu Elşən Mustafayev Baku TV-yə həmin dəhşətli gündən danışıb.

O qeyd edib ki, raket hücumu olan əraziyə hadisədən 15 dəqiqə sonra çatıb: “Gözüm atamı axtarırdı ki, yaralı olub-olmadığını öyrənim. Maşının içinə baxanda gördüm ki, atam yanıb həlak olub”.

Şəhidin anası Sehran Mustafayeva isə “mənim balam yemək yeməyə gəlirdi, şəhid oldu. Belə dəhşət heç bəlkə 1941-ci ildə də olmayıb”, – deyə terror aktından danışarkən söyləyib.