Gün işığı orqanizmə necə təsir edir? | Tədqiqat zamanı görün nədən istifadə olundu

Oklend Universitetinin alimləri müəyyən ediblər ki, gün işığı immun sisteminin infeksiyalarla mübarizə qabiliyyətini artırır.

Alimlər tədqiqat zamanı şəffaf bədən quruluşuna malik və genetik olaraq insanla oxşarlıq göstərən danio-rerio balıq modelindən istifadə ediblər. Bu model vasitəsilə immun hüceyrələrin davranışını real vaxtda izləmək mümkün olub.

Tədqiqat zamanı məlum olub ki, insan orqanizmində ən çox rast gəlinən ağ qan hüceyrələri olan neytrofillər gün işığı altında bakteriyaları daha aktiv şəkildə məhv edirlər. Onlar iltihab ocağına ilk çataraq orqanizmi patogenlərdən qoruyan əsas hüceyrələrdir.

Alimlər bildiriblər ki, bu kəşf gələcəkdə immun hüceyrələrin bioloji ritmlərini tənzimləyən dərmanların hazırlanmasına təkan verə bilər. Bu isə orqanizmin infeksiyalara və iltihab proseslərinə qarşı müqavimətini artırmağa kömək edəcək.

Hazırda tədqiqatçılar işığın immun hüceyrələrinə təsir mexanizmlərini daha dərindən öyrənməyə çalışırlar.