Növbəti köç karvanı Xocalının Ballıca kəndinə çatdı | Mənzillərin açarları təqdim edildi

Xocalı rayonunun Ballıca kəndinə ikinci dəfə köç prosesi gerçəkləşib. 21 ailə olmaqla 119 nəfər doğma yurda çatıb.

Kəndə köçən ailələri Xankəndi şəhərində, Ağdərə və Xocalı rayonlarında “Bərpa, Tikinti və İdarəetmə Xidməti” publik hüquqi şəxsin icraçı direktoru Telman Kərimli qarşılayıb. O, keçmiş məcburi köçkünləri təbrik edərək mənzillərin açarlarını ailələrə təqdim edib.

32 ildən sonra doğma yurdlarına qayıdan sakinlər sevinc hisslərini Baku TV ilə bölüşüblər.

“İllər sonra bu kəndə qayıtdığım üçün çox xoşbəxtəm. Təhsil aldığım məktəbə artıq müəllim kimi qayıdıram. Bizə bu sevinci yaşadan Ali Baş Komandana, Azərbaycan Ordusuna təşəkkür edirəm. Allah bütün şəhidlərimizə rəhmət etsin”, – Xocalı sakini Teymur Əzimov söyləyib.

Qeyd edək ki, Ballıca kəndinə ilk mərhələdə 27 ailə olmaqla 152 nəfər köçürülüb. Kənd içməli su, elektrik enerjisi, təbii qaz və internetlə təmin edilib.