Pulsuz qalan işçilər özündən çıxdı: “Gah deyirlər ki, bu gün vururuq, gah da...” - Baku TV

“Yol Tikinti Servis” MMC-də çalışan bir qrup şəxs aylardır əməkhaqqını ala bilməməkdən şikayət edir.

Ağır materialların daşınması ilə məşğul olan şirkətdə sürücü və digər texniki işlərdə çalışan şəxslərin sözlərinə görə, ödənişlərin verilməsi beş aya yaxındır ki, müxtəlif bəhanələrlə yubadılır.

Şikayətçilərdən biri bildirib ki, il yarım həmin müəssisədə çalışsa da, hazırda 1300 manat alacağını ala bilmir. O həmçinin heç bir xəbərdarlıq edilmədən işdən çıxarıldığını və artıq altı aydır ki, ödənişlə bağlı boş vədlər verildiyini vurğulayıb.

Məsələ ilə bağlı “AzerGold” QSC-nin şöbə müdiri Ariz Tarverdiyev qeyd edib ki, səhmdar cəmiyyəti ilə “Global Mining” MMC arasında 6 dekabr 2022-ci il tarixində imzalanmış müqavilənin qüvvədə olma müddəti cari ilin 6 fevral tarixində başa çatıb:

“Global Mining” MMC qeyd olunan müqavilə çərçivəsində “AzerGold”un Göygöl rayonunun Tülallar kəndində yerləşən eyniadlı qızıl mədənində süxur daşıma və digər əlaqəli işləri podratçı qismində icra edib. Görülmüş işlərə görə bütün ödənişlər “AzerGold” tərəfindən tam şəkildə və nəzərdə tutulmuş müddətdə həyata keçirilib. Hazırda adıçəkilən şirkətlə hər hansı aktiv müqavilə və ya borc öhdəliyi yoxdur”.

Ariz Tarverdiyev vurğulayıb ki, “Global Mining” MMC-nin öz subpodratçıları və ya əməkdaşları qarşısında yarana biləcək hər hansı öhdəlikləri “AzerGold” QSC-yə aid deyil və şirkət bu kimi hallara görə məsuliyyət daşımır:

“Eyni zamanda müqavilənin hüquqi qüvvəsinin başa çatması səbəbindən qeyd olunan məsələ ilə bağlı hər hansı təsir və ya müdaxilə imkanları da mövcud deyil”.