"Bu yollara baxsınlar, düzəltsinlər" | Masazırda gediş-gəliş niyə problemə çevrilib? - Baku TV

Masazır qəsəbəsinin Əliağa Vahid küçəsində yolların bərbad vəziyyətdə olması sakinlərin ciddi narazılığına səbəb olub.

Vətəndaşların sözlərinə görə, yay aylarında ərazidə güclü toz yaranır, qışda isə yol palçığa çevrilir və nəqliyyatın hərəkəti demək olar ki, çətinləşir.

Sürücülər bildirirlər ki, bir neçə ay əvvəl burada asfalt örtüyü çəkilsə də, yol düzgün hamarlanmayıb. Nəticədə, çökəkliklər yaranıb və avtomobillərin hərəkəti çətinləşib.

“Yol çöküb. Maşınlar gələndə yavaşlayır, 20–25 dəqiqə tıxac yaranır. Problem iki aydan çoxdur davam edir. Hətta bir dəfə mənim də maşınımın təkəri partlayacaqdı”, – deyə sürücülərdən biri bildirib.

“Buradan keçəndə maşınlarımızın altı dəyir, tıxac yaranır. Bəzən Masazırda bu yol səbəbindən saatlarla tıxacda qalırıq. Aidiyyəti qurumlara müraciət etmişik, amma hələ ki baxış keçirilməyib”, – digər sürücü qeyd edib.