"Vakansiya var, amma deyirlər ki..." | Görmə məhdudiyyətli məzun niyə işə qəbul edilmir? - Baku TV

Azərbaycan Milli Konservatoriyasının vokal ixtisası üzrə bakalavr məzunu Xalid Hacıyev gözdən əlil uşaqlar üçün 38 nömrəli musiqi məktəbində vakansiya olmasına baxmayaraq, işə qəbul edilmədiyini iddia edir.

“Aprel ayında yaxınlaşdım. Vakansiyalar olduğu halda məni işə qəbul etməyəcəklərini bildirdilər. Səbəbini soruşduqda isə “biz işə götürmürük” dedilər. Məndən əvvəl bəzi şəxslərin işə götürüldüyünü bildirdikdə onların göndərişlə gəldiyini söylədilər. Hansı qurumun göndərdiyini soruşduqda isə bunun Mədəniyyət Nazirliyi olduğunu qeyd etdilər”, – deyə şikayətçi Xalid Hacıyev bildirib.

Məsələ ilə bağlı Mədəniyyət Nazirliyindən bildirilib ki, qaydalara əsasən, müəllimlərin işə qəbulu bir qayda olaraq müsabiqə vasitəsilə həyata keçirilir:

“İmtahanlar ayrıca namizədlərin fərdi müraciəti əsasında deyil, Nazirlik tərəfindən müəyyən edilmiş vakansiyalar və elan edilmiş müsabiqə qrafiki əsasında keçirilir. Növbəti müsabiqə və vakansiyalar elan olunduğu halda bu barədə məlumat Mədəniyyət Nazirliyinin və Dövlət İmtahan Mərkəzinin rəsmi informasiya resurslarında yerləşdirilir. Hazırda imtahanların avqust ayının ilk 10 günlüyündə keçirilməsi nəzərdə tutulub. Ali musiqi təhsili olan şəxsin əlilliyinin olması onun musiqi məktəbində müəllim kimi işə qəbul olunmasına avtomatik hüquqi məhdudiyyət yaratmır. Əlilliyi olan şəxslərə münasibətdə ayrı-seçkilik qadağandır. Lakin həmin şəxs digər namizədlərlə eyni qaydada müvafiq ixtisas tələblərinə cavab verməli, elan edilmiş vakansiya üzrə müsabiqədə iştirak etməli, test və müsahibə mərhələlərində uğurlu nəticə göstərməli və qanunvericiliklə müəyyən edilmiş digər tələblərə uyğun olmalıdır”.