"Harada gəldi, belə işlər görürlər" - Taksi parkı ilə avtoservis əməkdaşlarının mübahisəsi - Baku TV

Nizami rayonu, Bəkir Çobanzadə küçəsində fəaliyyət göstərən “Bolt Avtopark 116” şirkəti ilə həmin ərazidə yerləşən avtoservis arasında anlaşılmazlıq yaranıb.

Belə ki, avtoservisin əməkdaşları iddia edirlər ki, sözügedən şirkət iş yerlərinin qarşısını zəbt edib. Bu səbəbdən servis əməkdaşları avtomobillərini ödənişsiz parklama ərazisində saxlaya bilmirlər.

“Onlara görə burada avtomobil saxlaya bilmirik. Maşını parklama ərazisindən kənarda saxlayanda isə cərimə olunuruq”, – deyə vətəndaşlardan biri narazılığını dilə gətirib.

Məsələ ilə bağlı “Bolt Avtopark 116”dan bildirilib ki, avtomobillərin çoxluğu hər gün müşahidə olunmur:

“Bu hallar baş verdikdə maşınlar texniki yoxlanışdan keçirilir”.

Nəqliyyat üzrə ekspert Elməddin Muradlının sözlərinə görə, həm avtoservis, həm də taksi parkı fəaliyyətə başlamazdan əvvəl ərazini düzgün təhlil etməli idi:

“Bu məsələlər əvvəlcədən düşünülməlidir. İş görən şəxs bütün incəlikləri öncədən nəzərə almalıdır. Belə olmaz. Orada ərazi zəbt olunub”.

Qeyd edək ki, yaşayış sahəsində fəaliyyət göstərən hər iki obyekt, ilk növbədə, avtomobillərin park edilməsini deyil, həmin ərazidə yaşayan vətəndaşların rahatlığını nəzərə almalıdır. Çünki sözügedən ərazi nə avtoservisə, nə də taksi parkına məxsusdur.