Sabunçuda kollektor dağıldı, evləri, həyətləri su basdı - Baku TV

Sabunçu rayonu, Sabunçu qəsəbəsi, Məhərrəm Süleymanov küçəsində güclü yağışlar zamanı ərazidəki kollektorun ətrafı uçub-dağılıb, içərisi torpaq və tullantılarla dolduğundan yağış suları axa bilmir.

Sakinlərdən biri bildirib ki, martıb 28-dən etibarən su həyətlərdə yığılıb:

“Evlərin hamısı suyun içində qalıb. Suyun səviyyəsi təxminən metr yarıma qədər qalxıb. Artıq 10-12 gündür ki, çəkilmir. Burada bir qram da yağış suyu yoxdur, hamısı kanalizasiya suyudur. Dəfələrlə məlumat vermişik, hətta şəkillərini də təqdim etmişik ki, kollektorun təmir olunması lazımdır. Bizə deyirlər ki, hələ maşınımız yoxdur”.

“Birinci dəfə yağış yağanda torpaq uçmuşdu. Gəlib qabağını təmizlədilər, su axmağa başladı. İkinci dəfə yenə torpaq üstünə töküldü. Gəlib baxdılar, dedilər, düzəldəcəklər, amma olduğu kimi qalıb. Bütün həyətlərin suları orada yığılıb. Qonşuların evlərini də su basıb”, – başqa bir sakin qeyd edib.

Məsələ ilə bağlı İri Şəhərlərin Birləşmiş Su Təchizatı Xidmətindən bildirilib ki, qeyd olunan ərazidə tullantı su xəttində təmir işlərinin aparılması üçün qazıntı işləri görülməlidir.

Qurumdan qeyd olunub ki, qazıntı işlərinin aparılması üçün müvafiq quruma müraciət edilib. İcazə alındıqdan sonra qazıntı işləri aparılacaq və xəttin təmir-bərpası həyata keçiriləcək.