Bab əl-Məndəb boğazının bağlanması ehtimalı ilə bağlı xəbərdarlıq

İranın Misirdəki diplomatik missiyasının rəhbəri Müctəba Ferdousipur Bab əl-Məndəb boğazının bağlanması ehtimalı ilə bağlı xəbərdarlıq edib.

Onun sözlərinə görə, ABŞ-nin İran adalarına desant çıxarması halında Yəməndə fəaliyyət göstərən “Ənsar Allah” hərəkatı strateji əhəmiyyətli Bab əl-Məndəb boğazını bağlaya bilər.

Diplomat bu fikirləri "RIA Novosti" agentliyinə müsahibəsində səsləndirib. O qeyd edib ki, Tehran müttəfiqlərindən birbaşa belə addım atmağı tələb etməsə də, bu variant mümkün cavab kimi mövcuddur.

Müctəba Ferdousipur vurğulayıb ki, Vaşinqtonun mümkün aqressiv addımları ciddi regional və qlobal böhranlara səbəb ola bilər. Onun sözlərinə görə, bu vəziyyət dünya iqtisadiyyatı və maliyyə bazarları üçün ağır nəticələr doğura bilər.

Qeyd edək ki, husilər daha əvvəl də Bab əl-Məndəb boğazının “aqressor ölkələr” üçün bağlanması ehtimalını istisna etməmişdi.