İsrailli girovların cəsədlərinin axtarışına başlandı

Misirin ağır texnika ilə təchiz edilən xilasedicilər və hərbi mütəxəssislər qrupu həlak olan israilli girovların cəsədlərinin axtarışı və ərazidən çıxarılması əməliyyatında iştirak etmək üçün Qəzza zolağına daxil olub.

Bildirilib ki, komanda İsrail hərbçilərinin nəzarətində olmayan ərazilərdə çalışacaq.

Bundan əlavə, misirli mütəxəssislərə iki ildir davam edən silahlı münaqişədən qalan partlamamış hərbi sursatların təmizlənməsi tapşırılacaq.

Xilasetmə qrupunun neçə nəfərdən ibarət olduğu və hansı avadanlıqlarla fəaliyyət göstərəcəyi açıqlanmasa da, onun missiyasının İsrail və ABŞ ilə sıx koordinasiyada həyata keçirildiyi vurğulanıb.

Qeyd edək ki, ABŞ Prezidenti Donald Trampın Qəzza münaqişəsinin həlli planı çərçivəsində HƏMAS İsrail həbsxanalarında saxlanılan 2000-ə yaxın fələstinlinin qarşılığında 20 girovu azad edib. Bundan əlavə, hərəkat əsirlikdə ölən 28 girovdan 15-nin qalıqlarını təhvil verib.