Maduro ABŞ-nin hərbi təhdidlərinə qarşı cavab tədbirlərindən danışıb

Venesuela Prezidenti Nikolas Maduro bildirib ki, ABŞ-nin hərbi təhdidlərinin cavabında ölkənin müdafiə qabiliyyətini gücləndirməyi qərara alıblar.

Məlumatı VTV telekanalı yayıb.

"Venesuela 25 həftə müddətində psixoloji terror, hərbi müdaxilə təhdidi, pirat hücumları və Venesuela neftini daşıyan gəminin ələ keçirilməsi kimi hadisələr yaşayıb. Latın Amerikası və Karib dənizi hövzəsində qanuni və diplomatik yollar tamamilə kəsilmişdi", – deyə N.Maduro Amerika xalqları üçün Bolivar Alyansının görüşü zamanı bildirib.

Qeyd edək ki, ABŞ sentyabrın əvvəlindən etibarən Venesuela gəmilərinə zərbə endirir, Pentaqon isə onlardan narkotiklərin daşınmasında istifadə edildiyini əsas gətirir. Dövlət Departamenti "Günəş karteli"ni terror təşkilatı hesab edir. Vaşinqtonun iddialarına görə, kartelə N.Maduro rəhbərlik edir.