Misir və Qətər Sudanda atəşkəsə nail olmaq istəyir

Sudanda hakimiyyətə gəlmək istəyən Çevik Dəstək Qüvvələri yüzlərlə meyiti yandıraraq basdırıb.

Sudanın tibb xidmətinin məlumatına görə, Darfur vilayətində bəzi insanlar, sadəcə, yandırılıb və dəfn olunmayıb. Bu addım Əl-Faşir şəhərinin sakinlərini qətliama məruz qoyanların cinayəti ört-basdır etmək cəhdi kimi yozulub. Buna görə də hüquq müdafiəçiləri Sudanda beynəlxalq istintaqın başladılmasını tələb edirlər.

Darfur vilayətinin müxtəlif hissələrində insanlar kütləvi surətdə qətlə yetirilirlər. Daha bir qaçqın düşərgəsi Əl-Dabba şəhərində yaradılıb və sağ qalanlar ora təxliyə olunurlar.

Qeyd edək ki, 12 milyondan çox insan evindən didərgin düşüb, 150 minə yaxın insan həlak olub. Səbəb 2019-cu ildə prezident Ömər əl-Bəşiri hərbi çevrilişlə devirən generallar arasında gedən hakimiyyət davasıdır.

Sudandakı vəziyyət Misir və Qətərin xarici işlər nazirləri arasında İstanbulda müzakirə edilib. Çevik Dəstək Qüvvələrinin hərbi əməliyyatları qınanıb. Sudanda atəşkəsə nail olmağın yolları araşdırılıb və humanitar dəhlizin yaradılmasının vacibliyi vurğulanıb. Bu arada Rusiyanın Sudanda hərbi-dəniz bazasının tikintisi dayandırılıb.

Belə ki, Sudanın müharibə meydanına çevrilməsi bazanın inşasına mane olur.

Bu barədə Rusiyanın Sudandakı səfiri Andrey Çernovol məlumat verib.

Məlumat üçün bildirək ki, hərbi-dəniz bazasının tikintisi barədə dövlətlərarası razılaşma 2020-ci ildə imzalanıb.